Se queredes participar na Asemblea Nacional debedes anotarvos antes.

Non sabemos o alcance real que poida ter o coñecemento de que para participar nesta Asemblea Nacional é preciso antes cubrir un escrito solicitándoo e entregalo no correspondente local comarcal. O Encontro Irmandiño conseguiu, non sen grandes dificultades, que esta cita puidese estar aberta ao conxunto da militancia. Isto é un grande triunfo para as persoas que defendemos até o final o modelo asemblear que caracteriza -ou caracterizaba- e singulariza ao BNG do resto das forzas políticas galegas. O que non puidemos evitar é que, unha vez máis, se continúen a provocar atrancos incomprensíbeis se o que se procura realmente é un novo BNG en que confíen amplos sectores sociais transformadores, como foi ata hai algúns anos. É por isto que alguén no aparato decidiu impór o requisito de irse anotar ao local comarcal para poder participar na NOSA Asemblea, no plenario da representación efectiva dos anceios de transformación e progreso do noso pobo. Pasamos a comunicarvos as datas de referencia pregándovos que as difundades entre todos os compañeiros e compañeiras que pensedes estean interesados/as en acudir a esta cita vital para o NOSO futuro.

Do 26 de decembro ao 4 de xaneiro estarán expostas nas sedes comarcais os censos provisionais dos e das militantes con dereito a participar nesta asemblea. É este o prazo habilitado para calquera reclamación a ese censo provisional .

Do 9 ao 21 de xaneiro deberás inscribirte no teu local comarcal. Debe ser un escrito persoal, asinado e entregado no local comarcal entre esas datas .

Para calquera consulta ao respecto deste proceso, escribídenos a este correo de Facebook ou a encontroaberto@encontroirmandinho.org e procuraremos contestarvos o máis rapidamente que nos sexa posíbel.